اليونانية والعبرية الكتاب المقدس
EZEKIEL 32

Eze 32:1
ויהי בשׁתי עשׂרה שׁנה בשׁני עשׂר חדשׁ באחד לחדשׁ היה דבר יהוה אלי לאמר׃
Eze 32:2
בן אדם שׂא קינה על פרעה מלך מצרים ואמרת אליו כפיר גוים נדמית ואתה כתנים בימים ותגח בנהרותיך ותדלח מים ברגליך ותרפס נהרותם׃
Eze 32:3
כה אמר אדני יהוה ופרשׂתי עליך את רשׁתי בקהל עמים רבים והעלוך בחרמי׃
Eze 32:4
ונטשׁתיך בארץ על פני השׂדה אטילך והשׁכנתי עליך כל עוף השׁמים והשׂבעתי ממך חית כל הארץ׃
Eze 32:5
ונתתי את בשׂרך על ההרים ומלאתי הגאיות רמותך׃
Eze 32:6
והשׁקיתי ארץ צפתך מדמך אל ההרים ואפקים ימלאון ממך׃
Eze 32:7
וכסיתי בכבותך שׁמים והקדרתי את ככביהם שׁמשׁ בענן אכסנו וירח לא יאיר אורו׃
Eze 32:8
כל מאורי אור בשׁמים אקדירם עליך ונתתי חשׁך על ארצך נאם אדני יהוה׃
Eze 32:9
והכעסתי לב עמים רבים בהביאי שׁברך בגוים על ארצות אשׁר לא ידעתם׃
Eze 32:10
והשׁמותי עליך עמים רבים ומלכיהם ישׂערו עליך שׂער בעופפי חרבי על פניהם וחרדו לרגעים אישׁ לנפשׁו ביום מפלתך׃
Eze 32:11
כי כה אמר אדני יהוה חרב מלך בבל תבואך׃
Eze 32:12
בחרבות גבורים אפיל המונך עריצי גוים כלם ושׁדדו את גאון מצרים ונשׁמד כל המונה׃
Eze 32:13
והאבדתי את כל בהמתה מעל מים רבים ולא תדלחם רגל אדם עוד ופרסות בהמה לא תדלחם׃
Eze 32:14
אז אשׁקיע מימיהם ונהרותם כשׁמן אוליך נאם אדני יהוה׃
Eze 32:15
בתתי את ארץ מצרים שׁממה ונשׁמה ארץ ממלאה בהכותי את כל יושׁבי בה וידעו כי אני יהוה׃
Eze 32:16
קינה היא וקוננוה בנות הגוים תקוננה אותה על מצרים ועל כל המונה תקוננה אותה נאם אדני יהוה׃
Eze 32:17
ויהי בשׁתי עשׂרה שׁנה בחמשׁה עשׂר לחדשׁ היה דבר יהוה אלי לאמר׃
Eze 32:18
בן אדם נהה על המון מצרים והורדהו אותה ובנות גוים אדרם אל ארץ תחתיות את יורדי בור׃
Eze 32:19
ממי נעמת רדה והשׁכבה את ערלים׃
Eze 32:20
בתוך חללי חרב יפלו חרב נתנה משׁכו אותה וכל המוניה׃
Eze 32:21
ידברו לו אלי גבורים מתוך שׁאול את עזריו ירדו שׁכבו הערלים חללי חרב׃
Eze 32:22
שׁם אשׁור וכל קהלה סביבותיו קברתיו כלם חללים הנפלים בחרב׃
Eze 32:23
אשׁר נתנו קברתיה בירכתי בור ויהי קהלה סביבות קברתה כלם חללים נפלים בחרב אשׁר נתנו חתית בארץ חיים׃
Eze 32:24
שׁם עילם וכל המונה סביבות קברתה כלם חללים הנפלים בחרב אשׁר ירדו ערלים אל ארץ תחתיות אשׁר נתנו חתיתם בארץ חיים וישׂאו כלמתם את יורדי בור׃
Eze 32:25
בתוך חללים נתנו משׁכב לה בכל המונה סביבותיו קברתה כלם ערלים חללי חרב כי נתן חתיתם בארץ חיים וישׂאו כלמתם את יורדי בור בתוך חללים נתן׃
Eze 32:26
שׁם משׁך תבל וכל המונה סביבותיו קברותיה כלם ערלים מחללי חרב כי נתנו חתיתם בארץ חיים׃
Eze 32:27
ולא ישׁכבו את גבורים נפלים מערלים אשׁר ירדו שׁאול בכלי מלחמתם ויתנו את חרבותם תחת ראשׁיהם ותהי עונתם על עצמותם כי חתית גבורים בארץ חיים׃
Eze 32:28
ואתה בתוך ערלים תשׁבר ותשׁכב את חללי חרב׃
Eze 32:29
שׁמה אדום מלכיה וכל נשׂיאיה אשׁר נתנו בגבורתם את חללי חרב המה את ערלים ישׁכבו ואת ירדי בור׃
Eze 32:30
שׁמה נסיכי צפון כלם וכל צדני אשׁר ירדו את חללים בחתיתם מגבורתם בושׁים וישׁכבו ערלים את חללי חרב וישׂאו כלמתם את יורדי בור׃
Eze 32:31
אותם יראה פרעה ונחם על כל המונה חללי חרב פרעה וכל חילו נאם אדני יהוה׃
Eze 32:32
כי נתתי את חתיתו בארץ חיים והשׁכב בתוך ערלים את חללי חרב פרעה וכל המונה נאם אדני יהוה׃

تابِع بَنْد - بشارة بَيَان