اليونانية والعبرية الكتاب المقدس
HABAKKUK 2

Hab 2:1
על משׁמרתי אעמדה ואתיצבה על מצור ואצפה לראות מה ידבר בי ומה אשׁיב על תוכחתי׃
Hab 2:2
ויענני יהוה ויאמר כתוב חזון ובאר על הלחות למען ירוץ קורא׃
Hab 2:3
כי עוד חזון למועד ויפח לקץ ולא יכזב אם יתמהמה חכה לו כי בא יבא לא יאחר׃
Hab 2:4
הנה עפלה לא ישׁרה נפשׁו בו וצדיק באמונתו יחיה׃
Hab 2:5
ואף כי היין בוגד גבר יהיר ולא ינוה אשׁר הרחיב כשׁאול נפשׁו והוא כמות ולא ישׂבע ויאסף אליו כל הגוים ויקבץ אליו כל העמים׃
Hab 2:6
הלוא אלה כלם עליו משׁל ישׂאו ומליצה חידות לו ויאמר הוי המרבה לא לו עד מתי ומכביד עליו עבטיט׃
Hab 2:7
הלוא פתע יקומו נשׁכיך ויקצו מזעזעיך והיית למשׁסות׃
Hab 2:8
כי אתה שׁלות גוים רבים ישׁלוך כל יתר עמים מדמי אדם וחמס ארץ קריה וכל ישׁבי׃
Hab 2:9
הוי בצע בצע רע לביתו לשׂום במרום קנו להנצל מכף רע׃
Hab 2:10
יעצת בשׁת לביתך קצות עמים רבים וחוטא נפשׁך׃
Hab 2:11
כי אבן מקיר תזעק וכפיס מעץ יעננה׃
Hab 2:12
הוי בנה עיר בדמים וכונן קריה בעולה׃
Hab 2:13
הלוא הנה מאת יהוה צבאות וייגעו עמים בדי אשׁ ולאמים בדי ריק יעפו׃
Hab 2:14
כי תמלא הארץ לדעת את כבוד יהוה כמים יכסו על ים׃
Hab 2:15
הוי משׁקה רעהו מספח חמתך ואף שׁכר למען הביט על מעוריהם׃
Hab 2:16
שׂבעת קלון מכבוד שׁתה גם אתה והערל תסוב עליך כוס ימין יהוה וקיקלון על כבודך׃
Hab 2:17
כי חמס לבנון יכסך ושׁד בהמות יחיתן מדמי אדם וחמס ארץ קריה וכל ישׁבי׃
Hab 2:18
מה הועיל פסל כי פסלו יצרו מסכה ומורה שׁקר כי בטח יצר יצרו עליו לעשׂות אלילים אלמים׃
Hab 2:19
הוי אמר לעץ הקיצה עורי לאבן דומם הוא יורה הנה הוא תפושׂ זהב וכסף וכל רוח אין בקרבו׃
Hab 2:20
ויהוה בהיכל קדשׁו הס מפניו כל הארץ׃

تابِع بَنْد - بشارة بَيَان