اليونانية والعبرية الكتاب المقدس
ISAIAH 29

أَسْبَق بَنْد - تابِع بَنْد - عَوْن


Isa 29:1
הוי אריאל אריאל קרית חנה דוד ספו שׁנה על שׁנה חגים ינקפו׃
Isa 29:2
והציקותי לאריאל והיתה תאניה ואניה והיתה לי כאריאל׃
Isa 29:3
וחניתי כדור עליך וצרתי עליך מצב והקימתי עליך מצרת׃
Isa 29:4
ושׁפלת מארץ תדברי ומעפר תשׁח אמרתך והיה כאוב מארץ קולך ומעפר אמרתך תצפצף׃
Isa 29:5
והיה כאבק דק המון זריך וכמץ עבר המון עריצים והיה לפתע פתאם׃
Isa 29:6
מעם יהוה צבאות תפקד ברעם וברעשׁ וקול גדול סופה וסערה ולהב אשׁ אוכלה׃
Isa 29:7
והיה כחלום חזון לילה המון כל הגוים הצבאים על אריאל וכל צביה ומצדתה והמציקים׃
Isa 29:8
והיה כאשׁר יחלם הרעב והנה אוכל והקיץ וריקה נפשׁו וכאשׁר יחלם הצמא והנה שׁתה והקיץ והנה עיף ונפשׁו שׁוקקה כן יהיה המון כל הגוים הצבאים על הר ציון׃
Isa 29:9
התמהמהו ותמהו השׁתעשׁעו ושׁעו שׁכרו ולא יין נעו ולא שׁכר׃
Isa 29:10
כי נסך עליכם יהוה רוח תרדמה ויעצם את עיניכם את הנביאים ואת ראשׁיכם החזים כסה׃
Isa 29:11
ותהי לכם חזות הכל כדברי הספר החתום אשׁר יתנו אתו אל יודע הספר לאמר קרא נא זה ואמר לא אוכל כי חתום הוא׃
Isa 29:12
ונתן הספר על אשׁר לא ידע ספר לאמר קרא נא זה ואמר לא ידעתי ספר׃
Isa 29:13
ויאמר אדני יען כי נגשׁ העם הזה בפיו ובשׂפתיו כבדוני ולבו רחק ממני ותהי יראתם אתי מצות אנשׁים מלמדה׃
Isa 29:14
לכן הנני יוסף להפליא את העם הזה הפלא ופלא ואבדה חכמת חכמיו ובינת נבניו תסתתר׃
Isa 29:15
הוי המעמיקים מיהוה לסתר עצה והיה במחשׁך מעשׂיהם ויאמרו מי ראנו ומי יודענו׃
Isa 29:16
הפככם אם כחמר היצר יחשׁב כי יאמר מעשׂה לעשׂהו לא עשׂני ויצר אמר ליוצרו לא הבין׃
Isa 29:17
הלוא עוד מעט מזער ושׁב לבנון לכרמל והכרמל ליער יחשׁב׃
Isa 29:18
ושׁמעו ביום ההוא החרשׁים דברי ספר ומאפל ומחשׁך עיני עורים תראינה׃
Isa 29:19
ויספו ענוים ביהוה שׂמחה ואביוני אדם בקדושׁ ישׂראל יגילו׃
Isa 29:20
כי אפס עריץ וכלה לץ ונכרתו כל שׁקדי און׃
Isa 29:21
מחטיאי אדם בדבר ולמוכיח בשׁער יקשׁון ויטו בתהו צדיק׃
Isa 29:22
לכן כה אמר יהוה אל בית יעקב אשׁר פדה את אברהם לא עתה יבושׁ יעקב ולא עתה פניו יחורו׃
Isa 29:23
כי בראתו ילדיו מעשׂה ידי בקרבו יקדישׁו שׁמי והקדישׁו את קדושׁ יעקב ואת אלהי ישׂראל יעריצו׃
Isa 29:24
וידעו תעי רוח בינה ורוגנים ילמדו לקח׃

تابِع بَنْد - بشارة بَيَان

God Rules.NET
Search 100+ volumes of books at one time.