اليونانية والعبرية الكتاب المقدس
JEREMIAH 4

Jer 4:1
אם תשׁוב ישׂראל נאם יהוה אלי תשׁוב ואם תסיר שׁקוציך מפני ולא תנוד׃
Jer 4:2
ונשׁבעת חי יהוה באמת במשׁפט ובצדקה והתברכו בו גוים ובו יתהללו׃
Jer 4:3
כי כה אמר יהוה לאישׁ יהודה ולירושׁלם נירו לכם ניר ואל תזרעו אל קוצים׃
Jer 4:4
המלו ליהוה והסרו ערלות לבבכם אישׁ יהודה וישׁבי ירושׁלם פן תצא כאשׁ חמתי ובערה ואין מכבה מפני רע מעלליכם׃
Jer 4:5
הגידו ביהודה ובירושׁלם השׁמיעו ואמרו ותקעו שׁופר בארץ קראו מלאו ואמרו האספו ונבואה אל ערי המבצר׃
Jer 4:6
שׂאו נס ציונה העיזו אל תעמדו כי רעה אנכי מביא מצפון ושׁבר גדול׃
Jer 4:7
עלה אריה מסבכו ומשׁחית גוים נסע יצא ממקמו לשׂום ארצך לשׁמה עריך תצינה מאין יושׁב׃
Jer 4:8
על זאת חגרו שׂקים ספדו והילילו כי לא שׁב חרון אף יהוה ממנו׃
Jer 4:9
והיה ביום ההוא נאם יהוה יאבד לב המלך ולב השׂרים ונשׁמו הכהנים והנביאים יתמהו׃
Jer 4:10
ואמר אהה אדני יהוה אכן השׁא השׁאת לעם הזה ולירושׁלם לאמר שׁלום יהיה לכם ונגעה חרב עד הנפשׁ׃
Jer 4:11
בעת ההיא יאמר לעם הזה ולירושׁלם רוח צח שׁפיים במדבר דרך בת עמי לוא לזרות ולוא להבר׃
Jer 4:12
רוח מלא מאלה יבוא לי עתה גם אני אדבר משׁפטים אותם׃
Jer 4:13
הנה כעננים יעלה וכסופה מרכבותיו קלו מנשׁרים סוסיו אוי לנו כי שׁדדנו׃
Jer 4:14
כבסי מרעה לבך ירושׁלם למען תושׁעי עד מתי תלין בקרבך מחשׁבות אונך׃
Jer 4:15
כי קול מגיד מדן ומשׁמיע און מהר אפרים׃
Jer 4:16
הזכירו לגוים הנה השׁמיעו על ירושׁלם נצרים באים מארץ המרחק ויתנו על ערי יהודה קולם׃
Jer 4:17
כשׁמרי שׂדי היו עליה מסביב כי אתי מרתה נאם יהוה׃
Jer 4:18
דרכך ומעלליך עשׂו אלה לך זאת רעתך כי מר כי נגע עד לבך׃
Jer 4:19
מעי מעי אחולה קירות לבי המה לי לבי לא אחרישׁ כי קול שׁופר שׁמעתי נפשׁי תרועת מלחמה׃
Jer 4:20
שׁבר על שׁבר נקרא כי שׁדדה כל הארץ פתאם שׁדדו אהלי רגע יריעתי׃
Jer 4:21
עד מתי אראה נס אשׁמעה קול שׁופר׃
Jer 4:22
כי אויל עמי אותי לא ידעו בנים סכלים המה ולא נבונים המה חכמים המה להרע ולהיטיב לא ידעו׃
Jer 4:23
ראיתי את הארץ והנה תהו ובהו ואל השׁמים ואין אורם׃
Jer 4:24
ראיתי ההרים והנה רעשׁים וכל הגבעות התקלקלו׃
Jer 4:25
ראיתי והנה אין האדם וכל עוף השׁמים נדדו׃
Jer 4:26
ראיתי והנה הכרמל המדבר וכל עריו נתצו מפני יהוה מפני חרון אפו׃
Jer 4:27
כי כה אמר יהוה שׁממה תהיה כל הארץ וכלה לא אעשׂה׃
Jer 4:28
על זאת תאבל הארץ וקדרו השׁמים ממעל על כי דברתי זמתי ולא נחמתי ולא אשׁוב ממנה׃
Jer 4:29
מקול פרשׁ ורמה קשׁת ברחת כל העיר באו בעבים ובכפים עלו כל העיר עזובה ואין יושׁב בהן אישׁ׃
Jer 4:30
ואתי שׁדוד מה תעשׂי כי תלבשׁי שׁני כי תעדי עדי זהב כי תקרעי בפוך עיניך לשׁוא תתיפי מאסו בך עגבים נפשׁך יבקשׁו׃
Jer 4:31
כי קול כחולה שׁמעתי צרה כמבכירה קול בת ציון תתיפח תפרשׂ כפיה אוי נא לי כי עיפה נפשׁי להרגים׃

تابِع بَنْد - بشارة بَيَان