اليونانية والعبرية الكتاب المقدس
JOB 42

Job 42:1
ויען איוב את יהוה ויאמר׃
Job 42:2
ידעת כי כל תוכל ולא יבצר ממך מזמה׃
Job 42:3
מי זה מעלים עצה בלי דעת לכן הגדתי ולא אבין נפלאות ממני ולא אדע׃
Job 42:4
שׁמע נא ואנכי אדבר אשׁאלך והודיעני׃
Job 42:5
לשׁמע אזן שׁמעתיך ועתה עיני ראתך׃
Job 42:6
על כן אמאס ונחמתי על עפר ואפר׃
Job 42:7
ויהי אחר דבר יהוה את הדברים האלה אל איוב ויאמר יהוה אל אליפז התימני חרה אפי בך ובשׁני רעיך כי לא דברתם אלי נכונה כעבדי איוב׃
Job 42:8
ועתה קחו לכם שׁבעה פרים ושׁבעה אילים ולכו אל עבדי איוב והעליתם עולה בעדכם ואיוב עבדי יתפלל עליכם כי אם פניו אשׂא לבלתי עשׂות עמכם נבלה כי לא דברתם אלי נכונה כעבדי איוב׃
Job 42:9
וילכו אליפז התימני ובלדד השׁוחי צפר הנעמתי ויעשׂו כאשׁר דבר אליהם יהוה וישׂא יהוה את פני איוב׃
Job 42:10
ויהוה שׁב את שׁבית איוב בהתפללו בעד רעהו ויסף יהוה את כל אשׁר לאיוב למשׁנה׃
Job 42:11
ויבאו אליו כל אחיו וכל אחיתיו וכל ידעיו לפנים ויאכלו עמו לחם בביתו וינדו לו וינחמו אתו על כל הרעה אשׁר הביא יהוה עליו ויתנו לו אישׁ קשׂיטה אחת ואישׁ נזם זהב אחד׃
Job 42:12
ויהוה ברך את אחרית איוב מראשׁתו ויהי לו ארבעה עשׂר אלף צאן ושׁשׁת אלפים גמלים ואלף צמד בקר ואלף אתונות׃
Job 42:13
ויהי לו שׁבענה בנים ושׁלושׁ בנות׃
Job 42:14
ויקרא שׁם האחת ימימה ושׁם השׁנית קציעה ושׁם השׁלישׁית קרן הפוך׃
Job 42:15
ולא נמצא נשׁים יפות כבנות איוב בכל הארץ ויתן להם אביהם נחלה בתוך אחיהם׃
Job 42:16
ויחי איוב אחרי זאת מאה וארבעים שׁנה וירא את בניו ואת בני בניו ארבעה דרות׃
Job 42:17
וימת איוב זקן ושׂבע ימים׃

تابِع بَنْد - بشارة بَيَان