اليونانية والعبرية الكتاب المقدس
JOSHUA 17

أَسْبَق بَنْد - تابِع بَنْد - عَوْن


Jos 17:1
ויהי הגורל למטה מנשׁה כי הוא בכור יוסף למכיר בכור מנשׁה אבי הגלעד כי הוא היה אישׁ מלחמה ויהי לו הגלעד והבשׁן׃
Jos 17:2
ויהי לבני מנשׁה הנותרים למשׁפחתם לבני אביעזר ולבני חלק ולבני אשׂריאל ולבני שׁכם ולבני חפר ולבני שׁמידע אלה בני מנשׁה בן יוסף הזכרים למשׁפחתם׃
Jos 17:3
ולצלפחד בן חפר בן גלעד בן מכיר בן מנשׁה לא היו לו בנים כי אם בנות ואלה שׁמות בנתיו מחלה ונעה חגלה מלכה ותרצה׃
Jos 17:4
ותקרבנה לפני אלעזר הכהן ולפני יהושׁע בן נון ולפני הנשׂיאים לאמר יהוה צוה את משׁה לתת לנו נחלה בתוך אחינו ויתן להם אל פי יהוה נחלה בתוך אחי אביהן׃
Jos 17:5
ויפלו חבלי מנשׁה עשׂרה לבד מארץ הגלעד והבשׁן אשׁר מעבר לירדן׃
Jos 17:6
כי בנות מנשׁה נחלו נחלה בתוך בניו וארץ הגלעד היתה לבני מנשׁה הנותרים׃
Jos 17:7
ויהי גבול מנשׁה מאשׁר המכמתת אשׁר על פני שׁכם והלך הגבול אל הימין אל ישׁבי עין תפוח׃
Jos 17:8
למנשׁה היתה ארץ תפוח ותפוח אל גבול מנשׁה לבני אפרים׃
Jos 17:9
וירד הגבול נחל קנה נגבה לנחל ערים האלה לאפרים בתוך ערי מנשׁה וגבול מנשׁה מצפון לנחל ויהי תצאתיו הימה׃
Jos 17:10
נגבה לאפרים וצפונה למנשׁה ויהי הים גבולו ובאשׁר יפגעון מצפון ובישׂשכר ממזרח׃
Jos 17:11
ויהי למנשׁה בישׂשכר ובאשׁר בית שׁאן ובנותיה ויבלעם ובנותיה ואת ישׁבי דאר ובנותיה וישׁבי עין דר ובנתיה וישׁבי תענך ובנתיה וישׁבי מגדו ובנותיה שׁלשׁת הנפת׃
Jos 17:12
ולא יכלו בני מנשׁה להורישׁ את הערים האלה ויואל הכנעני לשׁבת בארץ הזאת׃
Jos 17:13
ויהי כי חזקו בני ישׂראל ויתנו את הכנעני למס והורשׁ לא הורישׁו׃
Jos 17:14
וידברו בני יוסף את יהושׁע לאמר מדוע נתתה לי נחלה גורל אחד וחבל אחד ואני עם רב עד אשׁר עד כה ברכני יהוה׃
Jos 17:15
ויאמר אליהם יהושׁע אם עם רב אתה עלה לך היערה ובראת לך שׁם בארץ הפרזי והרפאים כי אץ לך הר אפרים׃
Jos 17:16
ויאמרו בני יוסף לא ימצא לנו ההר ורכב ברזל בכל הכנעני הישׁב בארץ העמק לאשׁר בבית שׁאן ובנותיה ולאשׁר בעמק יזרעאל׃
Jos 17:17
ויאמר יהושׁע אל בית יוסף לאפרים ולמנשׁה לאמר עם רב אתה וכח גדול לך לא יהיה לך גורל אחד׃
Jos 17:18
כי הר יהיה לך כי יער הוא ובראתו והיה לך תצאתיו כי תורישׁ את הכנעני כי רכב ברזל לו כי חזק הוא׃

تابِع بَنْد - بشارة بَيَان

God Rules.NET
Search 100+ volumes of books at one time.