اليونانية والعبرية الكتاب المقدس
JUDGES 4

Jdg 4:1
ויספו בני ישׂראל לעשׂות הרע בעיני יהוה ואהוד מת׃
Jdg 4:2
וימכרם יהוה ביד יבין מלך כנען אשׁר מלך בחצור ושׂר צבאו סיסרא והוא יושׁב בחרשׁת הגוים׃
Jdg 4:3
ויצעקו בני ישׂראל אל יהוה כי תשׁע מאות רכב ברזל לו והוא לחץ את בני ישׂראל בחזקה עשׂרים שׁנה׃
Jdg 4:4
ודבורה אשׁה נביאה אשׁת לפידות היא שׁפטה את ישׂראל בעת ההיא׃
Jdg 4:5
והיא יושׁבת תחת תמר דבורה בין הרמה ובין בית אל בהר אפרים ויעלו אליה בני ישׂראל למשׁפט׃
Jdg 4:6
ותשׁלח ותקרא לברק בן אבינעם מקדשׁ נפתלי ותאמר אליו הלא צוה יהוה אלהי ישׂראל לך ומשׁכת בהר תבור ולקחת עמך עשׂרת אלפים אישׁ מבני נפתלי ומבני זבלון׃
Jdg 4:7
ומשׁכתי אליך אל נחל קישׁון את סיסרא שׂר צבא יבין ואת רכבו ואת המונו ונתתיהו בידך׃
Jdg 4:8
ויאמר אליה ברק אם תלכי עמי והלכתי ואם לא תלכי עמי לא אלך׃
Jdg 4:9
ותאמר הלך אלך עמך אפס כי לא תהיה תפארתך על הדרך אשׁר אתה הולך כי ביד אשׁה ימכר יהוה את סיסרא ותקם דבורה ותלך עם ברק קדשׁה׃
Jdg 4:10
ויזעק ברק את זבולן ואת נפתלי קדשׁה ויעל ברגליו עשׂרת אלפי אישׁ ותעל עמו דבורה׃
Jdg 4:11
וחבר הקיני נפרד מקין מבני חבב חתן משׁה ויט אהלו עד אלון בצענים אשׁר את קדשׁ׃
Jdg 4:12
ויגדו לסיסרא כי עלה ברק בן אבינעם הר תבור׃
Jdg 4:13
ויזעק סיסרא את כל רכבו תשׁע מאות רכב ברזל ואת כל העם אשׁר אתו מחרשׁת הגוים אל נחל קישׁון׃
Jdg 4:14
ותאמר דברה אל ברק קום כי זה היום אשׁר נתן יהוה את סיסרא בידך הלא יהוה יצא לפניך וירד ברק מהר תבור ועשׂרת אלפים אישׁ אחריו׃
Jdg 4:15
ויהם יהוה את סיסרא ואת כל הרכב ואת כל המחנה לפי חרב לפני ברק וירד סיסרא מעל המרכבה וינס ברגליו׃
Jdg 4:16
וברק רדף אחרי הרכב ואחרי המחנה עד חרשׁת הגוים ויפל כל מחנה סיסרא לפי חרב לא נשׁאר עד אחד׃
Jdg 4:17
וסיסרא נס ברגליו אל אהל יעל אשׁת חבר הקיני כי שׁלום בין יבין מלך חצור ובין בית חבר הקיני׃
Jdg 4:18
ותצא יעל לקראת סיסרא ותאמר אליו סורה אדני סורה אלי אל תירא ויסר אליה האהלה ותכסהו בשׂמיכה׃
Jdg 4:19
ויאמר אליה השׁקיני נא מעט מים כי צמאתי ותפתח את נאוד החלב ותשׁקהו ותכסהו׃
Jdg 4:20
ויאמר אליה עמד פתח האהל והיה אם אישׁ יבוא ושׁאלך ואמר הישׁ פה אישׁ ואמרת אין׃
Jdg 4:21
ותקח יעל אשׁת חבר את יתד האהל ותשׂם את המקבת בידה ותבוא אליו בלאט ותתקע את היתד ברקתו ותצנח בארץ והוא נרדם ויעף וימת׃
Jdg 4:22
והנה ברק רדף את סיסרא ותצא יעל לקראתו ותאמר לו לך ואראך את האישׁ אשׁר אתה מבקשׁ ויבא אליה והנה סיסרא נפל מת והיתד ברקתו׃
Jdg 4:23
ויכנע אלהים ביום ההוא את יבין מלך כנען לפני בני ישׂראל׃
Jdg 4:24
ותלך יד בני ישׂראל הלוך וקשׁה על יבין מלך כנען עד אשׁר הכריתו את יבין מלך כנען׃

تابِع بَنْد - بشارة بَيَان