اليونانية والعبرية الكتاب المقدس
LEVITICUS 21

أَسْبَق بَنْد - تابِع بَنْد - عَوْن


Lev 21:1
ויאמר יהוה אל משׁה אמר אל הכהנים בני אהרן ואמרת אלהם לנפשׁ לא יטמא בעמיו׃
Lev 21:2
כי אם לשׁארו הקרב אליו לאמו ולאביו ולבנו ולבתו ולאחיו׃
Lev 21:3
ולאחתו הבתולה הקרובה אליו אשׁר לא היתה לאישׁ לה יטמא׃
Lev 21:4
לא יטמא בעל בעמיו להחלו׃
Lev 21:5
לא יקרחה קרחה בראשׁם ופאת זקנם לא יגלחו ובבשׂרם לא ישׂרטו שׂרטת׃
Lev 21:6
קדשׁים יהיו לאלהיהם ולא יחללו שׁם אלהיהם כי את אשׁי יהוה לחם אלהיהם הם מקריבם והיו קדשׁ׃
Lev 21:7
אשׁה זנה וחללה לא יקחו ואשׁה גרושׁה מאישׁה לא יקחו כי קדשׁ הוא לאלהיו׃
Lev 21:8
וקדשׁתו כי את לחם אלהיך הוא מקריב קדשׁ יהיה לך כי קדושׁ אני יהוה מקדשׁכם׃
Lev 21:9
ובת אישׁ כהן כי תחל לזנות את אביה היא מחללת באשׁ תשׂרף׃
Lev 21:10
והכהן הגדול מאחיו אשׁר יוצק על ראשׁו שׁמן המשׁחה ומלא את ידו ללבשׁ את הבגדים את ראשׁו לא יפרע ובגדיו לא יפרם׃
Lev 21:11
ועל כל נפשׁת מת לא יבא לאביו ולאמו לא יטמא׃
Lev 21:12
ומן המקדשׁ לא יצא ולא יחלל את מקדשׁ אלהיו כי נזר שׁמן משׁחת אלהיו עליו אני יהוה׃
Lev 21:13
והוא אשׁה בבתוליה יקח׃
Lev 21:14
אלמנה וגרושׁה וחללה זנה את אלה לא יקח כי אם בתולה מעמיו יקח אשׁה׃
Lev 21:15
ולא יחלל זרעו בעמיו כי אני יהוה מקדשׁו׃
Lev 21:16
וידבר יהוה אל משׁה לאמר׃
Lev 21:17
דבר אל אהרן לאמר אישׁ מזרעך לדרתם אשׁר יהיה בו מום לא יקרב להקריב לחם אלהיו׃
Lev 21:18
כי כל אישׁ אשׁר בו מום לא יקרב אישׁ עור או פסח או חרם או שׂרוע׃
Lev 21:19
או אישׁ אשׁר יהיה בו שׁבר רגל או שׁבר יד׃
Lev 21:20
או גבן או דק או תבלל בעינו או גרב או ילפת או מרוח אשׁך׃
Lev 21:21
כל אישׁ אשׁר בו מום מזרע אהרן הכהן לא יגשׁ להקריב את אשׁי יהוה מום בו את לחם אלהיו לא יגשׁ להקריב׃
Lev 21:22
לחם אלהיו מקדשׁי הקדשׁים ומן הקדשׁים יאכל׃
Lev 21:23
אך אל הפרכת לא יבא ואל המזבח לא יגשׁ כי מום בו ולא יחלל את מקדשׁי כי אני יהוה מקדשׁם׃
Lev 21:24
וידבר משׁה אל אהרן ואל בניו ואל כל בני ישׂראל׃

تابِع بَنْد - بشارة بَيَان

God Rules.NET
Search 100+ volumes of books at one time.