اليونانية والعبرية الكتاب المقدس
LEVITICUS 9

Lev 9:1
ויהי ביום השׁמיני קרא משׁה לאהרן ולבניו ולזקני ישׂראל׃
Lev 9:2
ויאמר אל אהרן קח לך עגל בן בקר לחטאת ואיל לעלה תמימם והקרב לפני יהוה׃
Lev 9:3
ואל בני ישׂראל תדבר לאמר קחו שׂעיר עזים לחטאת ועגל וכבשׂ בני שׁנה תמימם לעלה׃
Lev 9:4
ושׁור ואיל לשׁלמים לזבח לפני יהוה ומנחה בלולה בשׁמן כי היום יהוה נראה אליכם׃
Lev 9:5
ויקחו את אשׁר צוה משׁה אל פני אהל מועד ויקרבו כל העדה ויעמדו לפני יהוה׃
Lev 9:6
ויאמר משׁה זה הדבר אשׁר צוה יהוה תעשׂו וירא אליכם כבוד יהוה׃
Lev 9:7
ויאמר משׁה אל אהרן קרב אל המזבח ועשׂה את חטאתך ואת עלתך וכפר בעדך ובעד העם ועשׂה את קרבן העם וכפר בעדם כאשׁר צוה יהוה׃
Lev 9:8
ויקרב אהרן אל המזבח וישׁחט את עגל החטאת אשׁר׃
Lev 9:9
ויקרבו בני אהרן את הדם אליו ויטבל אצבעו בדם ויתן על קרנות המזבח ואת הדם יצק אל יסוד המזבח׃
Lev 9:10
ואת החלב ואת הכלית ואת היתרת מן הכבד מן החטאת הקטיר המזבחה כאשׁר צוה יהוה את משׁה׃
Lev 9:11
ואת הבשׂר ואת העור שׂרף באשׁ מחוץ למחנה׃
Lev 9:12
וישׁחט את העלה וימצאו בני אהרן אליו את הדם ויזרקהו על המזבח סביב׃
Lev 9:13
ואת העלה המציאו אליו לנתחיה ואת הראשׁ ויקטר על המזבח׃
Lev 9:14
וירחץ את הקרב ואת הכרעים ויקטר על העלה המזבחה׃
Lev 9:15
ויקרב את קרבן העם ויקח את שׂעיר החטאת אשׁר לעם וישׁחטהו ויחטאהו כראשׁון׃
Lev 9:16
ויקרב את העלה ויעשׂה כמשׁפט׃
Lev 9:17
ויקרב את המנחה וימלא כפו ממנה ויקטר על המזבח מלבד עלת הבקר׃
Lev 9:18
וישׁחט את השׁור ואת האיל זבח השׁלמים אשׁר לעם וימצאו בני אהרן את הדם אליו ויזרקהו על המזבח סביב׃
Lev 9:19
ואת החלבים מן השׁור ומן האיל האליה והמכסה והכלית ויתרת הכבד׃
Lev 9:20
וישׂימו את החלבים על החזות ויקטר החלבים המזבחה׃
Lev 9:21
ואת החזות ואת שׁוק הימין הניף אהרן תנופה לפני יהוה כאשׁר צוה משׁה׃
Lev 9:22
וישׂא אהרן את ידו אל העם ויברכם וירד מעשׂת החטאת והעלה והשׁלמים׃
Lev 9:23
ויבא משׁה ואהרן אל אהל מועד ויצאו ויברכו את העם וירא כבוד יהוה אל כל העם׃
Lev 9:24
ותצא אשׁ מלפני יהוה ותאכל על המזבח את העלה ואת החלבים וירא כל העם וירנו ויפלו על פניהם׃

تابِع بَنْد - بشارة بَيَان