اليونانية والعبرية الكتاب المقدس
NUMBERS 23

أَسْبَق بَنْد - تابِع بَنْد - عَوْن


Num 23:1
ויאמר בלעם אל בלק בנה לי בזה שׁבעה מזבחת והכן לי בזה שׁבעה פרים ושׁבעה אילים׃
Num 23:2
ויעשׂ בלק כאשׁר דבר בלעם ויעל בלק ובלעם פר ואיל במזבח׃
Num 23:3
ויאמר בלעם לבלק התיצב על עלתך ואלכה אולי יקרה יהוה לקראתי ודבר מה יראני והגדתי לך וילך שׁפי׃
Num 23:4
ויקר אלהים אל בלעם ויאמר אליו את שׁבעת המזבחת ערכתי ואעל פר ואיל במזבח׃
Num 23:5
וישׂם יהוה דבר בפי בלעם ויאמר שׁוב אל בלק וכה תדבר׃
Num 23:6
וישׁב אליו והנה נצב על עלתו הוא וכל שׂרי מואב׃
Num 23:7
וישׂא משׁלו ויאמר מן ארם ינחני בלק מלך מואב מהררי קדם לכה ארה לי יעקב ולכה זעמה ישׂראל׃
Num 23:8
מה אקב לא קבה אל ומה אזעם לא זעם יהוה׃
Num 23:9
כי מראשׁ צרים אראנו ומגבעות אשׁורנו הן עם לבדד ישׁכן ובגוים לא יתחשׁב׃
Num 23:10
מי מנה עפר יעקב ומספר את רבע ישׂראל תמת נפשׁי מות ישׁרים ותהי אחריתי כמהו׃
Num 23:11
ויאמר בלק אל בלעם מה עשׂית לי לקב איבי לקחתיך והנה ברכת ברך׃
Num 23:12
ויען ויאמר הלא את אשׁר ישׂים יהוה בפי אתו אשׁמר לדבר׃
Num 23:13
ויאמר אליו בלק לך נא אתי אל מקום אחר אשׁר תראנו משׁם אפס קצהו תראה וכלו לא תראה וקבנו לי משׁם׃
Num 23:14
ויקחהו שׂדה צפים אל ראשׁ הפסגה ויבן שׁבעה מזבחת ויעל פר ואיל במזבח׃
Num 23:15
ויאמר אל בלק התיצב כה על עלתך ואנכי אקרה כה׃
Num 23:16
ויקר יהוה אל בלעם וישׂם דבר בפיו ויאמר שׁוב אל בלק וכה תדבר׃
Num 23:17
ויבא אליו והנו נצב על עלתו ושׂרי מואב אתו ויאמר לו בלק מה דבר יהוה׃
Num 23:18
וישׂא משׁלו ויאמר קום בלק ושׁמע האזינה עדי בנו צפר׃
Num 23:19
לא אישׁ אל ויכזב ובן אדם ויתנחם ההוא אמר ולא יעשׂה ודבר ולא יקימנה׃
Num 23:20
הנה ברך לקחתי וברך ולא אשׁיבנה׃
Num 23:21
לא הביט און ביעקב ולא ראה עמל בישׂראל יהוה אלהיו עמו ותרועת מלך׃
Num 23:22
אל מוציאם ממצרים כתועפת ראם׃
Num 23:23
כי לא נחשׁ ביעקב ולא קסם בישׂראל כעת יאמר ליעקב ולישׂראל מה פעל אל׃
Num 23:24
הן עם כלביא יקום וכארי יתנשׂא לא ישׁכב עד יאכל טרף ודם חללים ישׁתה׃
Num 23:25
ויאמר בלק אל בלעם גם קב לא תקבנו גם ברך לא תברכנו׃
Num 23:26
ויען בלעם ויאמר אל בלק הלא דברתי אליך לאמר כל אשׁר ידבר יהוה אתו אעשׂה׃
Num 23:27
ויאמר בלק אל בלעם לכה נא אקחך אל מקום אחר אולי יישׁר בעיני האלהים וקבתו לי משׁם׃
Num 23:28
ויקח בלק את בלעם ראשׁ הפעור הנשׁקף על פני הישׁימן׃
Num 23:29
ויאמר בלעם אל בלק בנה לי בזה שׁבעה מזבחת והכן לי בזה שׁבעה פרים ושׁבעה אילם׃
Num 23:30
ויעשׂ בלק כאשׁר אמר בלעם ויעל פר ואיל במזבח׃

تابِع بَنْد - بشارة بَيَان

God Rules.NET
Search 100+ volumes of books at one time.