اليونانية والعبرية الكتاب المقدس
PROVERBS 13

Pro 13:1
בן חכם מוסר אב ולץ לא שׁמע גערה׃
Pro 13:2
מפרי פי אישׁ יאכל טוב ונפשׁ בגדים חמס׃
Pro 13:3
נצר פיו שׁמר נפשׁו פשׂק שׂפתיו מחתה׃
Pro 13:4
מתאוה ואין נפשׁו עצל ונפשׁ חרצים תדשׁן׃
Pro 13:5
דבר שׁקר ישׂנא צדיק ורשׁע יבאישׁ ויחפיר׃
Pro 13:6
צדקה תצר תם דרך ורשׁעה תסלף חטאת׃
Pro 13:7
ישׁ מתעשׁר ואין כל מתרושׁשׁ והון רב׃
Pro 13:8
כפר נפשׁ אישׁ עשׁרו ורשׁ לא שׁמע גערה׃
Pro 13:9
אור צדיקים ישׂמח ונר רשׁעים ידעך׃
Pro 13:10
רק בזדון יתן מצה ואת נועצים חכמה׃
Pro 13:11
הון מהבל ימעט וקבץ על יד ירבה׃
Pro 13:12
תוחלת ממשׁכה מחלה לב ועץ חיים תאוה באה׃
Pro 13:13
בז לדבר יחבל לו וירא מצוה הוא ישׁלם׃
Pro 13:14
תורת חכם מקור חיים לסור ממקשׁי מות׃
Pro 13:15
שׂכל טוב יתן חן ודרך בגדים איתן׃
Pro 13:16
כל ערום יעשׂה בדעת וכסיל יפרשׂ אולת׃
Pro 13:17
מלאך רשׁע יפל ברע וציר אמונים מרפא׃
Pro 13:18
רישׁ וקלון פורע מוסר ושׁומר תוכחת יכבד׃
Pro 13:19
תאוה נהיה תערב לנפשׁ ותועבת כסילים סור מרע׃
Pro 13:20
הלוך את חכמים וחכם ורעה כסילים ירוע׃
Pro 13:21
חטאים תרדף רעה ואת צדיקים ישׁלם טוב׃
Pro 13:22
טוב ינחיל בני בנים וצפון לצדיק חיל חוטא׃
Pro 13:23
רב אכל ניר ראשׁים וישׁ נספה בלא משׁפט׃
Pro 13:24
חושׂך שׁבטו שׂונא בנו ואהבו שׁחרו מוסר׃
Pro 13:25
צדיק אכל לשׂבע נפשׁו ובטן רשׁעים תחסר׃

تابِع بَنْد - بشارة بَيَان