اليونانية والعبرية الكتاب المقدس
SONG OF SOLOMON 6

Son 6:1
אנה הלך דודך היפה בנשׁים אנה פנה דודך ונבקשׁנו עמך׃
Son 6:2
דודי ירד לגנו לערוגות הבשׂם לרעות בגנים וללקט שׁושׁנים׃
Son 6:3
אני לדודי ודודי לי הרעה בשׁושׁנים׃
Son 6:4
יפה את רעיתי כתרצה נאוה כירושׁלם אימה כנדגלות׃
Son 6:5
הסבי עיניך מנגדי שׁהם הרהיבני שׂערך כעדר העזים שׁגלשׁו מן הגלעד׃
Son 6:6
שׁניך כעדר הרחלים שׁעלו מן הרחצה שׁכלם מתאימות ושׁכלה אין׃
Son 6:7
כפלח הרמון רקתך מבעד לצמתך׃
Son 6:8
שׁשׁים המה מלכות ושׁמנים פילגשׁים ועלמות אין מספר׃
Son 6:9
אחת היא יונתי תמתי אחת היא לאמה ברה היא ליולדתה ראוה בנות ויאשׁרוה מלכות ופילגשׁים ויהללוה׃
Son 6:10
מי זאת הנשׁקפה כמו שׁחר יפה כלבנה ברה כחמה אימה כנדגלות׃
Son 6:11
אל גנת אגוז ירדתי לראות באבי הנחל לראות הפרחה הגפן הנצו הרמנים׃
Son 6:12
לא ידעתי נפשׁי שׂמתני מרכבות עמי נדיב׃
Son 6:13 (7:1)
שׁובי שׁובי השׁולמית שׁובי שׁובי ונחזה בך מה תחזו בשׁולמית כמחלת המחנים׃

تابِع بَنْد - بشارة بَيَان