PREVIOUS CHAPTER - NEXT CHAPTER - HELP     

Ecc 6:1
ישׁ רעה אשׁר ראיתי תחת השׁמשׁ ורבה היא על האדם׃
Ecc 6:2
אישׁ אשׁר יתן לו  האלהים  עשׁר ונכסים וכבוד ואיננו חסר לנפשׁו מכל אשׁר יתאוה ולא ישׁליטנו האלהים לאכל ממנו כי אישׁ נכרי יאכלנו זה הבל וחלי רע הוא׃
Ecc 6:3
אם יוליד אישׁ מאה ושׁנים רבות יחיה ורב שׁיהיו ימי שׁניו ונפשׁו לא תשׂבע מן הטובה וגם קבורה לא היתה לו  אמרתי  טוב ממנו הנפל׃
Ecc 6:4
כי בהבל בא ובחשׁך ילך ובחשׁך שׁמו יכסה׃
Ecc 6:5
גם שׁמשׁ לא ראה ולא ידע נחת לזה מזה׃
Ecc 6:6
ואלו חיה אלף שׁנים פעמים וטובה לא ראה הלא אל מקום אחד הכל הולך׃
Ecc 6:7
כל עמל האדם לפיהו וגם הנפשׁ לא תמלא׃
Ecc 6:8
כי מה יותר לחכם מן הכסיל מה לעני יודע להלך נגד החיים׃
Ecc 6:9
טוב מראה עינים מהלך נפשׁ גם זה הבל ורעות רוח׃
Ecc 6:10
מה שׁהיה כבר נקרא שׁמו ונודע אשׁר הוא אדם ולא יוכל לדין עם שׁהתקיף ממנו׃
Ecc 6:11
כי ישׁ דברים הרבה מרבים הבל מה יתר לאדם׃
Ecc 6:12
כי מי יודע מה טוב לאדם בחיים מספר ימי חיי הבלו ויעשׂם כצל אשׁר מי יגיד לאדם מה יהיה אחריו תחת השׁמשׁ׃

GOTO NEXT CHAPTER - HEBREW & GREEK INDEX & SEARCH