PREVIOUS CHAPTER - NEXT CHAPTER - HELP - GR VIDEOS - GR YOUTUBE - TWITTER - SD1 YOUTUBE    

Exo 38:1
ויעשׂ את מזבח העלה עצי שׁטים חמשׁ אמות ארכו וחמשׁ אמות רחבו רבוע ושׁלשׁ אמות קמתו׃
Exo 38:2
ויעשׂ קרנתיו על ארבע פנתיו ממנו היו קרנתיו ויצף אתו נחשׁת׃
Exo 38:3
ויעשׂ את כל כלי המזבח את הסירת ואת היעים ואת המזרקת את המזלגת ואת המחתת כל כליו עשׂה נחשׁת׃
Exo 38:4
ויעשׂ למזבח מכבר מעשׂה רשׁת נחשׁת תחת כרכבו מלמטה עד חציו׃
Exo 38:5
ויצק ארבע טבעת בארבע הקצות למכבר הנחשׁת בתים לבדים׃
Exo 38:6
ויעשׂ את הבדים עצי שׁטים ויצף אתם נחשׁת׃
Exo 38:7
ויבא את הבדים בטבעת על צלעת המזבח לשׂאת אתו בהם  נבוב  לחת  עשׂה  אתו׃  
Exo 38:8
ויעשׂ את הכיור נחשׁת ואת כנו נחשׁת במראת הצבאת אשׁר צבאו פתח אהל מועד׃
Exo 38:9
ויעשׂ את החצר לפאת נגב תימנה קלעי החצר שׁשׁ משׁזר מאה באמה׃
Exo 38:10
עמודיהם עשׂרים ואדניהם עשׂרים נחשׁת ווי העמודים וחשׁקיהם כסף׃
Exo 38:11
ולפאת צפון מאה באמה עמודיהם עשׂרים ואדניהם עשׂרים נחשׁת ווי העמודים וחשׁקיהם כסף׃
Exo 38:12
ולפאת ים קלעים חמשׁים באמה עמודיהם עשׂרה ואדניהם עשׂרה ווי העמדים וחשׁוקיהם כסף׃
Exo 38:13
ולפאת קדמה מזרחה חמשׁים אמה׃
Exo 38:14
קלעים חמשׁ עשׂרה אמה אל הכתף עמודיהם שׁלשׁה ואדניהם שׁלשׁה׃
Exo 38:15
ולכתף השׁנית מזה ומזה לשׁער החצר קלעים חמשׁ עשׂרה אמה עמדיהם שׁלשׁה ואדניהם שׁלשׁה׃
Exo 38:16
כל קלעי החצר סביב שׁשׁ משׁזר׃
Exo 38:17
והאדנים לעמדים נחשׁת ווי העמודים וחשׁוקיהם כסף וצפוי ראשׁיהם כסף והם מחשׁקים כסף כל עמדי החצר׃
Exo 38:18
ומסך שׁער החצר מעשׂה רקם תכלת וארגמן ותולעת שׁני ושׁשׁ משׁזר ועשׂרים אמה ארך וקומה ברחב חמשׁ אמות לעמת קלעי החצר׃
Exo 38:19
ועמדיהם ארבעה ואדניהם ארבעה נחשׁת וויהם כסף וצפוי ראשׁיהם וחשׁקיהם כסף׃
Exo 38:20
וכל היתדת למשׁכן ולחצר סביב נחשׁת׃
Exo 38:21
אלה פקודי המשׁכן משׁכן העדת אשׁר פקד על פי משׁה עבדת הלוים ביד איתמר בן אהרן הכהן׃
Exo 38:22
ובצלאל בן אורי בן חור למטה יהודה עשׂה את כל אשׁר צוה יהוה את משׁה׃
Exo 38:23
ואתו אהליאב בן אחיסמך למטה דן חרשׁ וחשׁב ורקם בתכלת ובארגמן ובתולעת השׁני ובשׁשׁ׃
Exo 38:24
כל הזהב העשׂוי למלאכה בכל מלאכת הקדשׁ ויהי זהב התנופה תשׁע ועשׂרים ככר ושׁבע מאות ושׁלשׁים שׁקל בשׁקל הקדשׁ׃
Exo 38:25
וכסף פקודי העדה מאת ככר ואלף ושׁבע מאות וחמשׁה ושׁבעים שׁקל בשׁקל הקדשׁ׃
Exo 38:26
בקע לגלגלת מחצית השׁקל בשׁקל הקדשׁ לכל העבר על הפקדים מבן עשׂרים שׁנה ומעלה לשׁשׁ מאות אלף ושׁלשׁת אלפים וחמשׁ מאות וחמשׁים׃
Exo 38:27
ויהי מאת ככר הכסף לצקת את אדני הקדשׁ ואת אדני הפרכת מאת אדנים למאת הככר ככר לאדן׃
Exo 38:28
ואת האלף ושׁבע המאות וחמשׁה ושׁבעים עשׂה ווים לעמודים וצפה ראשׁיהם וחשׁק אתם׃
Exo 38:29
ונחשׁת התנופה שׁבעים ככר ואלפים וארבע מאות שׁקל׃
Exo 38:30
ויעשׂ בה  את  אדני  פתח  אהל  מועד  ואת  מזבח  הנחשׁת ואת מכבר הנחשׁת אשׁר לו  ואת  כל  כלי  המזבח׃
Exo 38:31
ואת אדני החצר סביב ואת אדני שׁער החצר ואת כל יתדת המשׁכן ואת כל יתדת החצר סביב׃

GOTO NEXT CHAPTER - HEBREW & GREEK INDEX & SEARCH