PREVIOUS CHAPTER - NEXT CHAPTER - HELP     

Isa 4:1
והחזיקו שׁבע נשׁים באישׁ אחד ביום ההוא לאמר לחמנו נאכל ושׂמלתנו נלבשׁ רק יקרא שׁמך עלינו אסף חרפתנו׃
Isa 4:2
ביום ההוא יהיה צמח יהוה לצבי ולכבוד ופרי הארץ לגאון ולתפארת לפליטת ישׂראל׃
Isa 4:3
והיה הנשׁאר בציון והנותר בירושׁלם קדושׁ יאמר לו  כל  הכתוב לחיים בירושׁלם׃
Isa 4:4
אם רחץ אדני את צאת בנות ציון ואת דמי ירושׁלם ידיח מקרבה ברוח משׁפט וברוח בער׃
Isa 4:5
וברא יהוה על כל מכון הר ציון ועל מקראה ענן יומם ועשׁן ונגה אשׁ להבה לילה כי על כל כבוד חפה׃
Isa 4:6
וסכה תהיה לצל יומם מחרב ולמחסה ולמסתור מזרם וממטר׃

GOTO NEXT CHAPTER - HEBREW & GREEK INDEX & SEARCH