PREVIOUS CHAPTER - NEXT CHAPTER - HELP     

Mic 6:1
שׁמעו נא את אשׁר יהוה אמר קום ריב את ההרים ותשׁמענה הגבעות קולך׃
Mic 6:2
שׁמעו הרים את ריב יהוה והאתנים מסדי ארץ כי ריב ליהוה עם עמו ועם ישׂראל יתוכח׃
Mic 6:3
עמי מה עשׂיתי לך  ומה  הלאתיך ענה׃
Mic 6:4
כי העלתיך מארץ מצרים ומבית עבדים פדיתיך ואשׁלח לפניך את משׁה אהרן ומרים׃
Mic 6:5
עמי זכר נא מה יעץ בלק מלך מואב ומה ענה אתו בלעם בן בעור מן השׁטים עד הגלגל למען דעת צדקות יהוה׃
Mic 6:6
במה אקדם יהוה אכף לאלהי מרום האקדמנו בעולות בעגלים בני שׁנה׃
Mic 6:7
הירצה יהוה באלפי אילים ברבבות נחלי שׁמן האתן בכורי פשׁעי פרי בטני חטאת נפשׁי׃
Mic 6:8
הגיד לך  אדם  מה  טוב ומה יהוה דורשׁ ממך כי אם עשׂות משׁפט ואהבת חסד והצנע לכת עם אלהיך׃
Mic 6:9
קול יהוה לעיר יקרא ותושׁיה יראה שׁמך שׁמעו מטה ומי יעדה׃
Mic 6:10
עוד האשׁ בית רשׁע אצרות רשׁע ואיפת רזון זעומה׃
Mic 6:11
האזכה במאזני רשׁע ובכיס אבני  מרמה׃
Mic 6:12
אשׁר עשׁיריה מלאו חמס וישׁביה דברו שׁקר ולשׁונם רמיה בפיהם׃
Mic 6:13
וגם אני החליתי הכותך השׁמם על חטאתך׃
Mic 6:14
אתה תאכל ולא תשׂבע וישׁחך בקרבך ותסג ולא תפליט ואשׁר תפלט לחרב אתן׃
Mic 6:15
אתה תזרע ולא תקצור אתה תדרך זית ולא תסוך שׁמן ותירושׁ ולא תשׁתה יין׃
Mic 6:16
וישׁתמר חקות עמרי וכל מעשׂה בית אחאב ותלכו במעצותם למען תתי אתך לשׁמה וישׁביה לשׁרקה וחרפת עמי תשׂאו׃

GOTO NEXT CHAPTER - HEBREW & GREEK INDEX & SEARCH