PREVIOUS CHAPTER - NEXT CHAPTER - HELP     

Son 4:1
הנך יפה רעיתי הנך יפה עיניך יונים מבעד לצמתך שׂערך כעדר העזים שׁגלשׁו מהר גלעד׃
Son 4:2
שׁניך כעדר הקצובות שׁעלו מן הרחצה שׁכלם מתאימות ושׁכלה אין׃
Son 4:3
כחוט השׁני שׂפתתיך ומדבריך נאוה כפלח הרמון רקתך מבעד לצמתך׃
Son 4:4
כמגדל דויד צוארך בנוי לתלפיות אלף המגן תלוי עליו כל שׁלטי הגבורים׃
Son 4:5
שׁני שׁדיך כשׁני עפרים תאומי צביה הרועים בשׁושׁנים׃
Son 4:6
עד שׁיפוח היום ונסו הצללים אלך לי  אל  הר  המור ואל גבעת הלבונה׃
Son 4:7
כלך יפה רעיתי ומום אין׃
Son 4:8
אתי מלבנון כלה אתי מלבנון תבואי תשׁורי מראשׁ אמנה מראשׁ שׂניר וחרמון ממענות אריות מהררי נמרים׃
Son 4:9
לבבתני אחתי כלה לבבתיני באחד מעיניך באחד ענק מצורניך׃
Son 4:10
מה יפו דדיך אחתי כלה מה טבו דדיך מיין וריח שׁמניך מכל בשׂמים׃
Son 4:11
נפת תטפנה שׂפתותיך כלה דבשׁ וחלב תחת לשׁונך וריח שׂלמתיך כריח לבנון׃
Son 4:12
גן נעול אחתי כלה גל נעול מעין חתום׃
Son 4:13
שׁלחיך פרדס רמונים עם פרי מגדים כפרים עם נרדים׃
Son 4:14
נרד וכרכם קנה וקנמון עם כל עצי לבונה מר ואהלות עם כל ראשׁי בשׂמים׃
Son 4:15
מעין גנים באר מים חיים ונזלים מן לבנון׃
Son 4:16
עורי צפון ובואי תימן הפיחי גני יזלו בשׂמיו יבא דודי לגנו ויאכל פרי מגדיו׃

GOTO NEXT CHAPTER - HEBREW & GREEK INDEX & SEARCH