PREVIOUS CHAPTER - NEXT CHAPTER - HELP     

57:1 in finem ne disperdas David in tituli inscriptione

57:2 si vere utique iustitiam loquimini recta iudicate filii hominum

57:3 etenim in corde iniquitates operamini in terra iniustitiam manus vestrae concinnant

57:4 alienati sunt peccatores a vulva erraverunt ab utero locuti sunt falsa

57:5 furor illis secundum similitudinem serpentis sicut aspidis surdae et obturantis aures suas

57:6 quae non exaudiet vocem incantantium et venefici incantantis sapienter

57:7 Deus conteret dentes eorum in ore ipsorum molas leonum confringet Dominus

57:8 ad nihilum devenient tamquam aqua decurrens intendit arcum suum donec infirmentur

57:9 sicut cera quae fluit auferentur supercecidit ignis et non viderunt solem

57:10 priusquam intellegerent spinae vestrae ramnum sicut viventes sicut in ira absorbet vos

57:11 laetabitur iustus cum viderit vindictam manus suas lavabit in sanguine peccatoris

57:12 et dicet homo si utique est fructus iusto utique est Deus iudicans eos in terra

GOTO NEXT CHAPTER - VULGATE INDEX & SEARCH