PREVIOUS CHAPTER - NEXT CHAPTER - HELP     

Ecc 11:1
שׁלח לחמך על פני המים כי ברב הימים תמצאנו׃
Ecc 11:2
תן חלק לשׁבעה וגם לשׁמונה כי לא תדע מה יהיה רעה על הארץ׃
Ecc 11:3
אם ימלאו העבים גשׁם על הארץ יריקו ואם יפול עץ בדרום ואם בצפון מקום שׁיפול העץ שׁם יהוא׃
Ecc 11:4
שׁמר רוח לא יזרע וראה בעבים לא יקצור׃
Ecc 11:5
כאשׁר אינך יודע מה דרך הרוח כעצמים בבטן המלאה ככה לא תדע את מעשׂה האלהים אשׁר יעשׂה את הכל׃
Ecc 11:6
בבקר זרע את זרעך ולערב אל תנח ידך כי אינך יודע אי זה יכשׁר הזה או זה ואם שׁניהם כאחד טובים׃
Ecc 11:7
ומתוק האור וטוב לעינים לראות את השׁמשׁ׃
Ecc 11:8
כי אם שׁנים הרבה יחיה האדם בכלם ישׂמח ויזכר את ימי החשׁך כי הרבה יהיו כל שׁבא הבל׃
Ecc 11:9
שׂמח בחור בילדותיך ויטיבך לבך בימי בחורותך והלך בדרכי לבך ובמראי עיניך ודע כי על כל אלה יביאך האלהים במשׁפט׃
Ecc 11:10
והסר כעס מלבך והעבר רעה מבשׂרך כי הילדות והשׁחרות הבל׃

GOTO NEXT CHAPTER - HEBREW & GREEK INDEX & SEARCH