PREVIOUS CHAPTER - NEXT CHAPTER - HELP     

Hos 6:1
לכו ונשׁובה אל יהוה כי הוא טרף וירפאנו יך ויחבשׁנו׃
Hos 6:2
יחינו מימים ביום השׁלישׁי יקמנו ונחיה לפניו׃
Hos 6:3
ונדעה נרדפה לדעת את יהוה כשׁחר נכון מוצאו ויבוא כגשׁם לנו  כמלקושׁ יורה ארץ׃
Hos 6:4
מה אעשׂה לך  אפרים  מה  אעשׂה לך  יהודה  וחסדכם כענן בקר וכטל משׁכים הלך׃
Hos 6:5
על כן חצבתי בנביאים הרגתים באמרי פי ומשׁפטיך אור יצא׃
Hos 6:6
כי חסד חפצתי ולא זבח ודעת אלהים מעלות׃
Hos 6:7
והמה כאדם עברו ברית שׁם בגדו׃
Hos 6:8
גלעד קרית פעלי און עקבה מדם׃
Hos 6:9
וכחכי אישׁ גדודים חבר כהנים דרך ירצחו שׁכמה כי זמה עשׂו׃
Hos 6:10
בבית ישׂראל ראיתי שׁעריריה שׁם זנות לאפרים נטמא ישׂראל׃
Hos 6:11
גם יהודה שׁת קציר לך  בשׁובי  שׁבות עמי׃

GOTO NEXT CHAPTER - HEBREW & GREEK INDEX & SEARCH