PREVIOUS CHAPTER - NEXT CHAPTER - HELP     

Isa 27:1
ביום ההוא יפקד יהוה בחרבו הקשׁה והגדולה והחזקה על לויתן נחשׁ ברח ועל לויתן נחשׁ עקלתון והרג את התנין אשׁר בים׃
Isa 27:2
ביום ההוא כרם חמד ענו׃
Isa 27:3
אני יהוה נצרה לרגעים אשׁקנה פן יפקד עליה לילה ויום אצרנה׃
Isa 27:4
חמה אין לי  מי  יתנני שׁמיר שׁית במלחמה אפשׂעה בה  אציתנה  יחד׃
Isa 27:5
או יחזק במעוזי יעשׂה שׁלום לי  שׁלום  יעשׂה׃
Isa 27:6
הבאים ישׁרשׁ יעקב יציץ ופרח ישׂראל ומלאו פני תבל תנובה׃
Isa 27:7
הכמכת מכהו הכהו אם כהרג הרגיו הרג׃
Isa 27:8
בסאסאה בשׁלחה תריבנה הגה ברוחו הקשׁה ביום קדים׃
Isa 27:9
לכן בזאת יכפר עון יעקב וזה כל פרי הסר חטאתו בשׂומו כל אבני  מזבח כאבני  גר  מנפצות לא יקמו אשׁרים וחמנים׃
Isa 27:10
כי עיר בצורה בדד נוה משׁלח ונעזב כמדבר שׁם ירעה עגל ושׁם ירבץ וכלה סעפיה׃
Isa 27:11
ביבשׁ קצירה תשׁברנה נשׁים באות מאירות אותה כי לא עם בינות הוא על כן לא ירחמנו עשׂהו ויצרו לא יחננו׃
Isa 27:12
והיה ביום ההוא יחבט יהוה משׁבלת הנהר עד נחל מצרים ואתם תלקטו לאחד אחד בני ישׂראל׃
Isa 27:13
והיה ביום ההוא יתקע בשׁופר גדול ובאו האבדים  בארץ אשׁור והנדחים בארץ מצרים והשׁתחוו ליהוה בהר הקדשׁ בירושׁלם׃

GOTO NEXT CHAPTER - HEBREW & GREEK INDEX & SEARCH