PREVIOUS CHAPTER - NEXT CHAPTER - HELP     

82:1 canticum psalmi Asaph

82:2 Deus quis similis erit tibi ne taceas neque conpescaris Deus

82:3 quoniam ecce inimici tui sonaverunt et qui oderunt te extulerunt caput

82:4 super populum tuum malignaverunt consilium et cogitaverunt adversus sanctos tuos

82:5 dixerunt venite et disperdamus eos de gente et non memoretur nomen Israhel ultra

82:6 quoniam cogitaverunt unianimiter simul adversum te testamentum disposuerunt

82:7 tabernacula Idumeorum et Ismahelitae Moab et Aggareni

82:8 Gebal et Ammon et Amalech alienigenae cum habitantibus Tyrum

82:9 etenim Assur venit cum illis facti sunt in adiutorium filiis Loth diapsalma

82:10 fac illis sicut Madiam et Sisarae sicut Iabin in torrente Cison

82:11 disperierunt in Endor facti sunt ut stercus terrae

82:12 pone principes eorum sicut Oreb et Zeb et Zebee et Salmana omnes principes eorum

82:13 qui dixerunt hereditate possideamus sanctuarium Dei

82:14 Deus meus pone illos ut rotam sicut stipulam ante faciem venti

82:15 sicut ignis qui conburit silvam sicut flamma conburens montes

82:16 ita persequeris illos in tempestate tua et in ira tua turbabis eos

82:17 imple facies illorum ignominia et quaerent nomen tuum Domine

82:18 erubescant et conturbentur in saeculum saeculi et confundantur et pereant

82:19 et cognoscant quia nomen tibi Dominus tu solus Altissimus in omni terra

GOTO NEXT CHAPTER - VULGATE INDEX & SEARCH