2:1 Son minn, ef þú veitir orðum mínum viðtöku og geymir boðorð mín hjá þér,

2:2 svo að þú ljáir spekinni athygli þína, hneigir hjarta þitt að hyggindum,

2:3 já, ef þú kallar á skynsemina og hrópar á hyggindin,

2:4 ef þú leitar að þeim sem að silfri og grefst eftir þeim eins og fólgnum fjársjóðum,

2:5 þá munt þú skilja, hvað ótti Drottins er, og öðlast þekking á Guði.

2:6 Því að Drottinn veitir speki, af munni hans kemur þekking og hyggindi.

2:7 Hann geymir hinum ráðvöndu gæfuna, er skjöldur þeirra, sem breyta grandvarlega,

2:8 með því að hann vakir yfir stigum réttarins og varðveitir veg sinna guðhræddu.

2:9 Þá munt þú og skilja, hvað réttlæti er og réttur og ráðvendni, _ í stuttu máli, sérhverja braut hins góða.

2:10 Því að speki mun koma í hjarta þitt, og þekking verða sálu þinni yndisleg.

2:11 Aðgætni mun vernda þig, og hyggindin varðveita þig,

2:12 til þess að frelsa þig frá vegi hins illa, frá þeim mönnum, sem fara með fals,

2:13 sem yfirgefa stigu einlægninnar og ganga á vegum myrkursins

2:14 sem hafa gleði af því að gjöra illt, fagna yfir illsku hrekkjum,

2:15 sem gjöra vegu sína hlykkjótta og komnir eru út á glapstigu í breytni sinni,

2:16 til þess að frelsa þig frá léttúðarkonu, frá blíðmálugri konu sem annar á,

2:17 sem yfirgefið hefir unnusta æsku sinnar og gleymt sáttmála Guðs síns,

2:18 því að hús hennar hnígur í dauðann, og brautir hennar liggja niður til framliðinna,

2:19 þeir sem inn til hennar fara, snúa engir aftur, og aldrei komast þeir á lífsins stigu, _

2:20 til þess að þú gangir á vegi góðra manna og haldir þig á stigum réttlátra.

2:21 Því að hinir hreinskilnu munu byggja landið, og hinir grandvöru verða eftir í því.