PREVIOUS CHAPTER - NEXT CHAPTER - HELP     

Job 2:1
ויהי היום ויבאו בני האלהים להתיצב על  יהוה  ויבוא  גם  השׂטן בתכם להתיצב על  יהוה׃  
Job 2:2
ויאמר יהוה אל  השׂטן  אי  מזה תבא ויען השׂטן את  יהוה  ויאמר  משׁט  בארץ  ומהתהלך׃
Job 2:3
ויאמר יהוה אל  השׂטן  השׂמת  לבך  אל  עבדי איוב כי  אין  כמהו  בארץ  אישׁ  תם  וישׁר ירא אלהים וסר מרע ועדנו מחזיק בתמתו ותסיתני בו  לבלעו חנם׃
Job 2:4
ויען השׂטן את  יהוה  ויאמר  עור  בעד  עור  וכל  אשׁר  לאישׁ  יתן  בעד  נפשׁו׃
Job 2:5
אולם שׁלח נא  ידך  וגע  אל  עצמו ואל בשׂרו אם  לא  אל פניך יברכך׃
Job 2:6
ויאמר יהוה אל  השׂטן  הנו  בידך  אך  את נפשׁו שׁמר׃
Job 2:7
ויצא השׂטן מאת פני יהוה ויך את  איוב  בשׁחין רע  מכף  רגלו  עד  קדקדו׃
Job 2:8
ויקח לו  חרשׂ להתגרד בו  והוא ישׁב בתוך האפר׃
Job 2:9
ותאמר לו  אשׁתו עדך מחזיק בתמתך ברך אלהים ומת׃
Job 2:10
ויאמר אליה כדבר אחת הנבלות תדברי גם  את  הטוב נקבל מאת האלהים ואת הרע לא  נקבל  בכל  זאת  לא  חטא איוב בשׂפתיו׃
Job 2:11
וישׁמעו שׁלשׁת רעי איוב את  כל  הרעה הזאת הבאה עליו ויבאו אישׁ ממקמו אליפז התימני ובלדד השׁוחי וצופר הנעמתי ויועדו יחדו לבוא לנוד לו  ולנחמו׃
Job 2:12
וישׂאו את  עיניהם מרחוק ולא הכירהו וישׂאו קולם ויבכו ויקרעו אישׁ מעלו ויזרקו עפר על  ראשׁיהם השׁמימה׃
Job 2:13
וישׁבו אתו לארץ שׁבעת ימים ושׁבעת לילות ואין דבר אליו דבר כי  ראו  כי  גדל הכאב מאד׃

GOTO NEXT CHAPTER - HEBREW & GREEK INDEX & SEARCH