PREVIOUS CHAPTER - NEXT CHAPTER - HELP     

Isa 39:1
בעת ההוא שׁלח מרדך  בלאדן  בן  בלאדן מלך בבל ספרים ומנחה אל חזקיהו וישׁמע כי חלה ויחזק׃
Isa 39:2
וישׂמח עליהם חזקיהו ויראם את בית נכתה את הכסף ואת הזהב ואת הבשׂמים ואת השׁמן הטוב ואת כל בית כליו ואת כל אשׁר נמצא באצרתיו לא היה דבר אשׁר לא הראם חזקיהו בביתו ובכל ממשׁלתו׃
Isa 39:3
ויבא ישׁעיהו הנביא אל המלך חזקיהו ויאמר אליו מה אמרו האנשׁים האלה ומאין יבאו אליך ויאמר חזקיהו מארץ רחוקה באו אלי מבבל׃
Isa 39:4
ויאמר מה ראו בביתך ויאמר חזקיהו את כל אשׁר בביתי ראו לא היה דבר אשׁר לא הראיתים באוצרתי׃
Isa 39:5
ויאמר ישׁעיהו אל חזקיהו שׁמע דבר יהוה צבאות׃
Isa 39:6
הנה ימים באים ונשׂא כל אשׁר בביתך ואשׁר אצרו אבתיך  עד  היום הזה בבל לא יותר דבר אמר יהוה׃
Isa 39:7
ומבניך אשׁר יצאו ממך אשׁר תוליד יקחו והיו סריסים בהיכל מלך בבל׃
Isa 39:8
ויאמר חזקיהו אל ישׁעיהו טוב דבר יהוה אשׁר דברת ויאמר כי יהיה שׁלום ואמת בימי׃

GOTO NEXT CHAPTER - HEBREW & GREEK INDEX & SEARCH