| |  |
  Eze 3:1
ויאמר אלי בן אדם את אשׁר תמצא אכול אכול את המגלה הזאת ולך דבר אל בית ישׂראל׃
Eze 3:2
ואפתח את פי ויאכלני את המגלה הזאת׃
Eze 3:3
ויאמר אלי בן אדם בטנך תאכל ומעיך תמלא את המגלה הזאת אשׁר אני נתן אליך ואכלה ותהי בפי כדבשׁ למתוק׃
Eze 3:4
ויאמר אלי בן אדם לך בא אל בית ישׂראל ודברת בדברי אליהם׃
Eze 3:5
כי לא אל עם עמקי שׂפה וכבדי לשׁון אתה שׁלוח אל בית ישׂראל׃
Eze 3:6
לא אל עמים רבים עמקי שׂפה וכבדי לשׁון אשׁר לא תשׁמע דבריהם אם לא אליהם שׁלחתיך המה ישׁמעו אליך׃
Eze 3:7
ובית ישׂראל לא יאבו לשׁמע אליך כי אינם אבים לשׁמע אלי כי כל בית ישׂראל חזקי מצח וקשׁי לב המה׃
Eze 3:8
הנה נתתי את פניך חזקים לעמת פניהם ואת מצחך חזק לעמת מצחם׃
Eze 3:9
כשׁמיר חזק מצר נתתי מצחך לא תירא אותם ולא תחת מפניהם כי בית מרי המה׃
Eze 3:10
ויאמר אלי בן אדם את כל דברי אשׁר אדבר אליך קח בלבבך ובאזניך שׁמע׃
Eze 3:11
ולך בא אל הגולה אל בני עמך ודברת אליהם ואמרת אליהם כה אמר אדני יהוה אם ישׁמעו ואם יחדלו׃
Eze 3:12
ותשׂאני רוח ואשׁמע אחרי קול רעשׁ גדול ברוך כבוד יהוה ממקומו׃
Eze 3:13
וקול כנפי החיות משׁיקות אשׁה אל אחותה וקול האופנים לעמתם וקול רעשׁ גדול׃
Eze 3:14
ורוח נשׂאתני ותקחני ואלך מר בחמת רוחי ויד יהוה עלי חזקה׃
Eze 3:15
ואבוא אל הגולה תל אביב הישׁבים אל נהר כבר ואשׁר המה יושׁבים שׁם ואשׁב שׁם שׁבעת ימים משׁמים בתוכם׃
Eze 3:16
ויהי מקצה שׁבעת ימים ויהי דבר יהוה אלי לאמר׃
Eze 3:17
בן אדם צפה נתתיך לבית ישׂראל ושׁמעת מפי דבר והזהרת אותם ממני׃
Eze 3:18
באמרי לרשׁע מות תמות ולא הזהרתו ולא דברת להזהיר רשׁע מדרכו הרשׁעה לחיתו הוא רשׁע בעונו ימות ודמו מידך אבקשׁ׃
Eze 3:19
ואתה כי הזהרת רשׁע ולא שׁב מרשׁעו ומדרכו הרשׁעה הוא בעונו ימות ואתה את נפשׁך הצלת׃
Eze 3:20
ובשׁוב צדיק מצדקו ועשׂה עול ונתתי מכשׁול לפניו הוא ימות כי לא הזהרתו בחטאתו ימות ולא תזכרן צדקתו אשׁר עשׂה ודמו מידך אבקשׁ׃
Eze 3:21
ואתה כי הזהרתו צדיק לבלתי חטא צדיק והוא לא חטא חיו יחיה כי נזהר ואתה את נפשׁך הצלת׃
Eze 3:22
ותהי עלי שׁם יד יהוה ויאמר אלי קום צא אל הבקעה ושׁם אדבר אותך׃
Eze 3:23
ואקום ואצא אל הבקעה והנה שׁם כבוד יהוה עמד ככבוד אשׁר ראיתי על נהר כבר ואפל על פני׃
Eze 3:24
ותבא בי רוח ותעמדני על רגלי וידבר אתי ויאמר אלי בא הסגר בתוך ביתך׃
Eze 3:25
ואתה בן אדם הנה נתנו עליך עבותים ואסרוך בהם ולא תצא בתוכם׃
Eze 3:26
ולשׁונך אדביק אל חכך ונאלמת ולא תהיה להם לאישׁ מוכיח כי בית מרי המה׃
Eze 3:27
ובדברי אותך אפתח את פיך ואמרת אליהם כה אמר אדני יהוה השׁמע ישׁמע והחדל יחדל כי בית מרי המה׃
СЛЕДУЮЩАЯ ГЛАВА - ИНДЕКС БИБЛИИ И ПОИСК
|
